Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Бисмиллаҳир раҳмонир раҳийм
Ассалому алейкум азиз ўқувчилар. Барчангизга қувончли, файзли ва омадли дамларни тилаган ҳолда, Бақара сурасининг 22 – ояти таржимаси ва тафсирига киришамиз:
<الَّذِى جَعَلَ لَكُمُ الْأَرْضَ فِرَ شاً وَالسَّمَآءَ بِنَآءً وَأَنْزَلَ مِنَ السَّمَآءِ مَآءً فَأَخْرَجَ بِهِ مِنَ الَّثمَرتِ رِزْقاً لَّكُمْ فَلَا تَجْعَلُواْ للَّهِ أَنْدَاداً وَأَنْتُمْ تَعْلَمُونَ>
«Сизлар учун ерни пойандоз, осмонни бошпана қилиб қўйган ва осмондан сув туширган ва у билан мевалардан сизлар учун ризқ чиқарган зот Удир. Демак, билганингиз ҳолда Аллоҳ учун шериклар қилиб қўймангиз.»
Бу оятда Аллоҳ таоло турли неъматларга ишора қилмоқда, уларнинг ҳар бири бошқа неъматларнинг сарчашмасидир. Аллоҳ таоло тупроқ куррасида инсоннинг ҳаёти учун ерни гиламдек тўшаган. Ундаги тоғ – далалар, сув ва тупроқ, ер қаъридаги турли- туман минераллар ва конлар инсон ҳаётининг боқийлиги учун муносиб муҳитни яратиб беришган. Ер билан осмон ўртасидаги ҳамоҳанглик натижасида ёмғир ёғади ва ўт – ўланлар ўсиб чиқади. Булар ҳам инсоннинг ризқи ва озуқасини таъминлайди.
Бу оятдан биринчидан, Аллоҳ таолонинг неъматларига эътибор қаратмоқ Рабб таолога ибодат ва бандалик қилиш ҳамда Аллоҳни танишнинг энг афзал йўлларидан бири эканлигини;
Иккинчидан, еру кўк ўртасидаги тартиб ва ҳамоҳанглик, олим ҳамда қодир зот бўлмиш Аллоҳ борлигининг энг ёрқин далили эканлигини;
Учинчидан эса, Аллоҳ таоло борлиқни башар учун яратгани ва бошқа мавжудотларни яратишдан мурод инсон фойдаланиши бўлганини ўрганиб оламиз.
Энди Бақара сурасининг 23 – ояти таржимаси ҳамда тафсирига қулоқ тутамиз:
<وَإِنْ كُنْتُمْ فِى رَيْبٍ مِّمَّا نَزَّلْنَا عَلَى عَبْدِنَا فَأْتُواْ بِسُورَةٍ مِّنْ مِّثْلِهِ وَادْعُواْ شُهَدَآءَكُمْ مِّن دُونِ اللَّهِ إِنْ كُنْتُمْ صَدِقِينَ>
«Ва агар бандамизга туширган нарсамиздан шубҳада бўлсангиз, агар рост сўзловчилар бўлсангиз унга ўхшаш бир сура келтиринг ва Аллоҳдан ўзга ёрдамчиларингизни ёрдамга чақиринг.»
Ҳар бир пайғамбар ўзининг пайғамбарлигини исботлаш учун бошқаларни қўлидан келмайдиган мўъжиза деб, аталмиш бирор фавқулодда амални кўрсатиши керак. Ислом пайғамбари (с) нинг энг буюк мўъжизалари, бошқалар сўз ва мазмун жиҳатидан уни амалга оширишдан ожиз бўлган Қуръони Каримдир. Аллоҳ таоло Ислом душманларини кўп маротаба курашга чорлаб, агар сизлар бу китобни Аллоҳники деб, билмасангиз ва уни башар қўли билан тузилган, деб ҳисобласангиз, Исломнинг нидоси сўниши учун унга ўхшаш бирор китобни келтиринг – чи, -дея таъкидлаган. Қизиқарлиси шундаки, Қуръон ушбу курашувга чақиришда бир неча бор душманлар ишини осонлаштириб, аввалида Қуръонга ўхшаш китобни олиб келишни буюрган бўлса, иккинчи марта эса, Қуръондаги сураларга ўхшаш ўнта сурани келтиришни талаб қилган. Бу оятда эса, ҳеч бўлмаганда Қуръондагига ўхшаш бир сурани келтиришни талаб қилмоқда. Худди шунингдек, Қуръон уларга бу ишни бажаришда ер юзидаги барча шерикларингиз ва ғоядошларингиздан ёрдам сўранг, аммо билингизким, бу иш қўлингиздан келмайди, дея таъкидламоқда.
Бу оятдан биринчидан, пайғамбарлар фақат Аллоҳнинг бандаси бўлишгани ва Унгагина таслим бўлганлари учун, илоҳий ваҳийни қабул қилишга муносиб деб, кўрилишганини;
Иккинчидан эса, Қуръони Карим далил ва ҳужжат китоби эканлиги ҳамда шубҳа ва васвасага ҳеч қандай ўрин қолдирмаслигини ўрганиб оламиз.
Суҳбатимиз сўнггида Бақара сурасининг 24 – ояти таржимаси ҳамда тафсири билан танишамиз:
<فَإِن لَّمْ تَفْعَلُواْ وَلَن تَفْعَلُواْ فَاتَّقُواْ النَّارَ الَّتِى وَقُودُهَا النَّاسُ وَالْحِجَارَةُ أُعِدَّتْ لِلْكَفِرينَ>
«Демак, агар қилмасангиз ва ҳаргиз қила олмайсиз ҳам, шунда ёқилғиси одамлар ва тош [бут ва санам]лар бўлган ва кофирлар учун ҳозирлаб қўйилган оловдан сақланингиз.»
Олдинги оятнинг давоми ўлароқ, бу оятда Аллоҳ субҳонаҳу ва таолонинг vҳаргиз қила олмайсиз ҳамb, дейиши улкан бир мўъжизадир. Бу ерда Қуръон сураларидан биттасига ўхшаш сурани ҳеч қачон келтира ололмаслик таъкидлаб айтилмоқда. Оятда баён этилган тошлардан мурод, ё жаҳаннам оловини вужудга келтирувчи кўмир тошлардир ёки Ислом душманлари Худо деб, сиғинган тошдан ясалган бутлардир. Анбиё сурасининг 98 – оятида марҳамат қилинганидек – «Сизлар ва сиғинаётганингиз Аллоҳдан ўзга нарсалар жаҳаннам ўтинидир.»
Бу оятдан биринчидан, ўз динимизнинг ҳақлиги борасида мухолифлар билан қатъийлик ила гаплашишимиз лозимлигини;
Иккинчидан эса, инсон куфр туфайли тош ва қадрсиз нарсаларнинг қаторига тушиб қолишини ўрганиб оламиз.
