Ҳалол гўштли ҳайвонларнинг буйрагини еса бўладими?

Related Articles

РАМАЗОН ҲАЙИТИНИ ҚАНДАЙ АНИҚЛАШ МУМКИН ВА АНИҚЛАНМАГАН ТАҚДИРДА РЎЗА ТУТА ОЛАМИЗМИ?

2 hafta ago

Моида сурасининг юзингиз ва оёқларингизни тўпиқларигача ювинглар, дейилган таржимаси нотўғрими?

Dekabr 12, 2023

Вузу (таҳорат) олганда оёқларга масҳ тортиладими ёки ювиладими? (7)

Dekabr 8, 2023

Ассалому алайкум, Нажот кемаси жамоаси. Бу қилаётган ишларингиз учун Аллоҳ сизлардан рози бўлсин. Саволим шуки, ҳалол гўштли ҳайвонларнинг буйрагини еса бўладими? Асосан ҳалол гўштли ҳайвонларнинг нечта ва қайси аъзоларини истеъмол қилиш ҳалол-у, қайсилари ҳаром? Ушбу масалага ойдинлик киритсангиз, олдиндан раҳмат.

Ҳурмат билан Шокиржон

Бисмиллаҳир Роҳманир Роҳийм

Ва алайкум ассалом ва раҳматуллоҳ. Аллоҳ таоло сиздан ҳам рози бўлсин!

Ҳалол гўштли ҳайвонларнинг ейиш ҳаром бўлган аъзолари қуйидагилардан иборат:

1. Қон;

2. Сийдик ва ахлат;

3. Гўштдаги турли безлар;

4. Мояк ва уруғдон;

5. Ҳайвоннинг бош миясида бўлган нўхат шаклидаги нарса;

6. Бел умуртқа поғонасида жойлашган ҳаром мағз (медулла);

7. Бел умуртқа поғонасининг икки тарафида жойлашган оқ рангли ва қаттиқ шаклдаги асаб тизмаси;

8. Эркак ҳайвоннинг жинсий аъзоси;

9. Урғочи ҳайвоннинг фаржи (жинсий аъзоси);

10. Ўт пуфаги (жигарнинг пастки юзасидаги махсус чуқурчада жойлашган, ҳажми 50-60 см, шакли нокка ўхшаш пуфакча ва унда ортиқча ўт сақланади);

11. Қоражигар ёки талоқ

Юқорида зикр этилган аъзолар сувда яшамайдиган чорва ҳайвонлари ва паррандаларга хосдир. Аммо ушбу аъзолар балиқларда ва чигирткада топилса, уларни истеъмол қилиш ҳаром эмас.

12. Қовуқ (сийдик пуфаги);

13. Кўз чаноғи;

14. Ҳайвоннинг икки туёғи орасида жойлашган ва “зотул-ашожеъ” деб айтилган нарсани ҳам истеъмол қилиш ҳаромдир.[1]

Охирги бу уч аъзо ҳам сўйиладиган туя, чорва ҳайвонлари ва паррандаларга хосдир. Шу учун, ушбу уч аъзони балиқлар, креветка ва чигирткаларда истеъмол қилиш ҳаром эмас.[2]

Демак, юқорида айтиб ўтилган ҳалол гўштли ҳайвонларнинг ейиш ҳаром бўлган аъзолари орасида буйрак айтилмаган. Шу боис, барча мужтаҳидларнинг фатволарига биноан, ҳалол гўштли ҳайвонларнинг буйрагини истеъмол қилмоқлик ҳалол ва мумкиндир.

Фойдаланилган манбалар:

[1]. Имом Хумайний, “Тавзиҳул масоил” 2626 – масала ва қолган мужтаҳидлар ҳам еб-ичишга оид аҳкомлар қисмида худди шу нарсаларни баён қилганлар.

[2]. Имом Хумайний, «Таҳрирул васила» 2-жилд, таомлар ва ичимликлар китоби, 161-бет, 28-масала. Бошқа мужтаҳидлар ушбу масалани баён қилганлар.

Эҳтиром ила:

Нажот Кемаси таҳририяти