Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Ассалому алайкум, ҳурматли таҳририят. Мани ошқозоним касал сурункали дўхтурга бориб даволандим, кейин сўрадим ман рўза тутсам бўладими деб. Дўхтур айтдики, сенинг ошқозонинг касал, уни авайлашинг керак ва агар авайламасанг, бундан ҳам оғирроқ бўлишинг мумкин, бўлмаслигинг ҳам мумкин. Ҳеч бўлмаса, 3 кун рўза тутсанг, 1 ҳафта 10 кун рўза тутмагин, яна 3 кун тутишни тавсия қиламан, деди. Энди агар 3 кун рўза тутиб кейин 10 кундан сўнг яна 3 кун рўза тутсам, қолганини қазо қилиб тутиб беришим керакми ёки 30 кун бирдан рўза тутишим керакми? Рўза ойи яқинлашиб келаётгани учун шу саволларимнинг жавобини иложи бўлса тезроқ берсангиз. Олдиндан катта раҳмат.
Ҳурмат билан
Камолиддин
Бисмиллаҳир Роҳманир Роҳийм
Ва алайкум ассалом. Рўза тутиш масаласида шуни айтишимиз керакки, агар ҳақиқатан ҳам ошқонингиз касал бўлса ва шунингдек, мутахассис ва моҳир шифокор ҳам рўза тутиш сиз учун зарарли эканини таъкидлаб айтган бўлса ҳамда рўза тутиш соғлигизни жиддий ҳолда хатар остида қолдирадиган бўлса, у ҳолда Рамазон ойида рўза тутмоқлик нафақат вожиб эмас, балки рўза тутиш сизга ҳаром бўлади.
Албатта, ҳолатингизни рўза тутиш учун текшириб кўриш мақсадида бир неча кун рўза тутиб кўришингиз мумкин. Агар ҳақиқатан ҳам рўза тўтиш сизга зарарли бўлса, у ҳолда рўза тутманг, балки рўза тутмаган ҳар бир кунингиз учун бир «муд таом» фақир-муҳтожларга беришингиз шарт. Албатта, ошқонингиз соғайиб кетганидан кейин фақат тутмаган рўзаларингиз қазосини тутиб берасиз ва ҳеч бир каффора рўза бўйнингизда бўлмайди.
Албатта, шуни ҳам таъкидлаб ўтиш керакки, сизга рўза тутиш зарарли эканига табиб сўзлари асосида ва ўзингизни текшириб кўриш билан ишонч ҳосил қилишингиз шарт, акс ҳолда Аллоҳнинг вожибига енгил қараш ҳисобланиб, қазодан ташқари 60 кун каффора рўза ҳам вожиб бўлади. Шунга кўра, агар рўза тутсам, жуда оч қолиб кетаман ёки рўза тутсам, бошим айланади, ошқозоним оғрайди ёхуд Мен ўзим ориқман, агар рўза тутсам янада ориқлаб кетаман каби баҳоналар рўза тутмасликка сабаб бўла олмайди ва рўза тутмаган тақдирда 30 кун қазо рўзаларни тутиб бериш билан бирга 60 кун каффора рўзани ҳам тутиш вожиб бўлади.
Лекин шариатимиз осон ва енгилликка асослангани учун чиндан ҳам узри бўлганлар, масалан; ҳомиладор ва болага сут эмизадиган аёллар рўза тутган тақдирда болага зарар етадиган бўлса ёки ошқозонида яраси бўлганлар, қанд касалига мубтало бўлганлар рўза тутган тақдирда мутахассис ва моҳир шифокорнинг ташхисига биноан, уларнинг соғлигини хавф остида қолдирадиган бўлса, бундай шахсларга Рамазон ойида рўза тутиш вожиб бўлмайди. Балки шариати исломияда айтилганидек, улар рўза тутмаган ҳар бир кун учун бир «муд таом» фақир-муҳтожларга беришлари шарт. Бир муд таомнинг миқдори 750 грамм буғдой, ун, нон, арпа, хурмо ва шунга ўхшашлардан иборат. Албатта, мазкур шахслар соғайиб кетганларидан кейин тутмаган рўзаларининг қазосини тутиб беришлари вожибдир. Аллоҳ таоло Рамазон ойида ҳаммамизга рўза тутиш ва Ўзининг ибодати бўлиш таффиқини насиб айласин. Омин!
