Дунёдаги энг моҳир пардоз устаси ким эканлигини ва унинг ишxонаси қаерда эканлигини биласизми?
Ҳа, у сизга текинга ва асосан бепул xизмат қилишга шай туради. Сизлар учун турли моделлардаги кийим фасонларидан тортиб бошқа зийнат воситаларини беради. У нафақат сиздаги камчиликларни беркитади, балки бу камчилик ва нуқсонларни гўзал шаклда зийнатлаб кўрсатади ҳам. Ишонмасангиз мана бу оятга мурожаат қилинг:
وَزَيَّنَ لَهُمُ الشَّيْطَانُ مَا كَانُوا يَعْمَلُونَ
«Шайтон уларга қилиб юрган ишларини зийнатли қилиб кўрсатди» (Анъом сураси, 43 -оят)
Бундан ташқари, бу “Уста” ранглаш ҳунарига ҳам эгадир. У ҳақиқат юзига ноҳақлик ва ботиллик рангини усталик билан қоплайди. Кўрган одам бу ноҳақлик ва ботиллик ранги эмас, балки асл ҳақиқат ранги деб ўйлайди. Яна У артистлик ҳунарига ҳам эга ва турли ролларни қойилмақом қилиб ўйнайди. Одамни ишонтириб туриб орқасидан жарликка қараб итариб юборади.
وَإِذْ زَيَّنَ لَهُمُ الشَّيْطَانُ أَعْمَالَهُمْ وَقَالَ لَا غَالِبَ لَكُمُ الْيَوْمَ مِنَ النَّاسِ وَإِنِّي جَارٌ لَّكُمْ ۖ فَلَمَّا تَرَاءَتِ الْفِئَتَانِ نَكَصَ عَلَىٰ عَقِبَيْهِ وَقَالَ إِنِّي بَرِيءٌ مِّنكُمْ إِنِّي أَرَىٰ مَا لَا تَرَوْنَ إِنِّي أَخَافُ اللَّـهَ ۚ وَاللَّـهُ شَدِيدُ الْعِقَابِ ﴿٤٨
«Ўшанда шайтон уларга қилаётган ишларини зийнатли қилиб кўрсатиб: «Бу кун одамлардан сизларга ғолиб келадигани йўқ. Мана, мен ёнингиздадирман!» – деди. Икки гуруҳ (лашкарлар) тўқнашганда эса (Шайтон) ортига чекиниб: «Албатта, мен сизлардан безорман. Мен сизлар кўрмаётган нарсани кўраяпман. Мен Аллоҳдан қўрқаман. Аллоҳ жазоси шиддатли зотдир», – деди.» (Анфол сураси, 48-оят)
У шунингдек, даромад топиш йўлида ҳар қандай ишни ўзига касб қилиб олган. Масалан, машинаси билан киракашлик ҳам қилади. Лекин машинасини ҳайдаётганида йўл ҳаракати қоидаларига сира риоя қилмайди ҳам. Тағин, тўғри йўл қолиб қийшиқ йўллардан олиб ўтиб мақсад у ёқда қолиб ғирт тескари тарафга қараб ҳайдайди. Аxир-оқибат, авто ҳалокатга учраб йўловчиларини ўлим қаърига улоқтиради.
يَا أَيُّهَا النَّاسُ إِنَّ وَعْدَ اللَّـهِ حَقٌّ ۖ فَلَا تَغُرَّنَّكُمُ الْحَيَاةُ الدُّنْيَا ۖ وَلَا يَغُرَّنَّكُم بِاللَّـهِ الْغَرُورُ ﴿٥﴾ إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا ۚ إِنَّمَا يَدْعُو حِزْبَهُ لِيَكُونُوا مِنْ أَصْحَابِ السَّعِيرِ ﴿٦
«Эй инсонлар, албатта, Аллоҳнинг ваъдаси ҳақдир. Бас, сизларни бу дунё ҳаёти сира алдаб қўймасин! Яна сизларни ўта алдамчи (шайтон) Аллоҳ ҳақида алдаб қўймасин!»
«Албатта, шайтон сизларга душмандир. Демак, уни душман тутинглар! У ўз гуруҳини (ўзига эргашганларни) фақат ўта қизиган дўзаx аҳлидан бўлишга чақирур, холос.» (Фотир сураси; 5 ва 6 оятлар)
Шайтон одамларни Аллоҳ ҳақида алдаб, ҳеч нарсага парво қилма, Аллоҳнинг Ўзи кечиргувчидир, деган васвасалар билан уларни турли гуноҳ ишларга чорлайди. Демак, Аллоҳ таолонинг авф этиши ва мағфират қилишини суистеъмол этиб, Аллоҳ Ўзи кечирувчи зот, деб ҳар хил гуноҳларга қўл уриш ўта ёмон шайтоний иш экани шубҳасиздир.
Шайтон ҳатто экин экишга ҳам уста. Албатта, у деҳқонларга ўxшаб фойдали маҳсулотлар экмай, балки инсонлар қалбига гина-кудурат уруғини экади.
Шайтоннинг яна бир “ҳунари” учувчиликдир. У васваса қанотлари билан одамлар қалбининг тепасида парвоз қилиб, ўзига муносиб қўниш ерини (васвасага учраган қалбни) излайди ва топиши биланоқ дарров унга қўнади. Шунинг учун, Қуръони Каримда тақво эгаси бўлиш шайтоннинг шарридан омонда қолиш йўли сифатида зикр этилади:
إِنَّ الَّذِينَ اتَّقَوْا إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا فَإِذَا هُم مُّبْصِرُونَ ﴿٢٠١
«Тақво қилганларга шайтондан бирор васваса етса, (дарҳол Аллоҳни) эслайдилар. Шунда ногаҳон улар (ҳақни) кўрувчидирлар.» (Аъроф сураси; 201-оят)
Аллоҳдан қўрқувчи тақво эгаларига шайтондан бирор бир васваса, иғво ва ғазаб етиб қолса, улар зудлик билан Аллоҳни ёдга оладилар. Шунда ногаҳон уларнинг кўзи ҳақни ва тўғри йўлни кўрувчи бўлади. Негаки, Аллоҳнинг зикри илм-маърифат, кўзи очиқлик ва оқиллик манбаидир. Бунинг акси ўлароқ, шайтоннинг васвасаси эса жаҳолат, кўрлик ва нодонликка бошлайди.
Баён этилган шунча шарҳлардан кейин энди айтингчи, минг бир “ҳунарга” эга шайтонни яxшилаб таниб олдингизми?! Кўпроқ билишингиз учун шуни ҳам қўшимча қилиб айтамизки, у Аллоҳга қасам ичиб сизни йўлдан уришга аҳд-паймон қилган ўта аразли душмандир. Ишонмайсизми, мана бу ояти каримани ўқиб кўринг:
قَالَ فَبِمَا أَغْوَيْتَنِي لَأَقْعُدَنَّ لَهُمْ صِرَاطَكَ الْمُسْتَقِيمَ ﴿١٦﴾ ثُمَّ لَآتِيَنَّهُم مِّن بَيْنِ أَيْدِيهِمْ وَمِنْ خَلْفِهِمْ وَعَنْ أَيْمَانِهِمْ وَعَن شَمَائِلِهِمْ ۖ وَلَا تَجِدُ أَكْثَرَهُمْ شَاكِرِينَ ﴿١٧
«У (аламидан Аллоҳ таолога) деди: «Қасамёд этаманки, мени адаштирганинг туфайли мудом Сенинг тўғри йўлинг устида уларни (одамларни чалғитиш) учун ўтираман.» (Аъроф сураси; 16-оят)
«Сўнгра уларга олдиларидан ва орқаларидан, ўнг ва сўл томонларидан (тўғри йўлдан оздириш учун) келурман. Ва (оқибатда) уларнинг кўпларини шукр қилувчи ҳолда топмагайсан.» (Аъроф сураси; 17-оят)
Шундай қилиб, энг ашаддий душманингизни таниб олдингиз. Ана энди сизга айтадиган насиҳатимизни ҳеч қачон ёдингиздан чиқарманг:
Иймонни кэмирувчи бу ашаддий душманнинг иш юритадиган макони жуда кенгдир. Шундай экан, ҳамиша унинг тўрига илинишдан эҳтиёт бўлинг!
NAJOTKEMASI.NET – Халқаро Исломий Ахборот ва Тадқиқот Марказида тайёрланди.
