Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Ассалому алайкум. Мен ҳажга борганимда бир муаммога дуч келдим, шуни ҳукмини силардан сўрамоқчи эдим. Мен таматтуъ умра учун эҳром кийиб амалларни бажариш мақсадида ҳамроҳларим билан бирга Ҳарамга келдик-да, тавоф қилаётиб уларни йўқотиб қўйдим ва шу пайт шошганимдан хаёлдан кўтарилиб, Сафо ва Марва оралиғида саъй қилиш ва тақсир қилишни эсдан чиқариб қўйиб тезлик билан меҳмонхонага қайтиб келдим-у, эҳром либосини эгнимдан ечдим. Ҳолбуки, таматтуъ умранинг амалларини ҳали тўлиқ бажармаган эдим. Менинг таматтуъ умрамнинг ҳукми қандай? Нима қилишим керак бўлган? Жавоб учун олдиндан раҳмат.
Бисмиллааҳир Роҳмаанир Роҳийм
Ва алайкум ассалом. Сўралган масаланинг ҳукмини тўлиқ билиб олиш учун ушбу масалага доир мужтаҳидларимизнинг фатволарини кўздан кечирамиз;
1. Тавоф намози билан саъй амали ўртасида рухсат этилган оралиқ масофа қолдириш борасида шундай фатво берилган:
Тавоф намозидан кейин дарҳол саъй амалини бажариш вожиб эмас. Шунинг учун, агар бирор киши тавоф намозини куннинг аввалида ўқиса, саъй амалини кечанинг охиригача бажариш унга жоиздир. Албатта, саъй амалини кейинги кунга қадар кечиктириш жоиз эмасдир. (Оятуллоҳ Систоний фатволари, 269-саволга жавобан)
Манба: https://www.sistani.org/persian/book/52/210/
Юқоридаги фатводан кўриниб турибдики, ҳожи киши таматтуъ умранинг амалларини бажараётиб тавоф қилиб унинг икки ракъат намозини ўқиса, ихтиёрий ҳолда саъй амали ва тақсир қилишни кечанинг охиригача бажарса бўлади. Агар ночор ҳолда қолиб ўша кечанинг охиригача саъй амали ва тақсир қила олмаса, бу икки амални кейинги кунга кечиртириб бажариш мумкин.
2. Кимки, саъй амалини билмасдан ё эсдан чиқариб бажармай эҳром либосини эгнидан чиқарса, агар аёли билан жинсий алоқа қилиб қўйган бўлса, у ҳолда саъй амалини бажариш билан бирга, эҳтиёт вожибга кўра бир сигирни каффорат сифатида бериш унга вожиб бўлади.
Манба: Оятуллоҳ Саййид Али Ҳусайний Хоманаий, «Маносикул ҳаж», 157-бет, 307-масала ва http://farsi.khamenei.ir/treatise-content?id=220#3486
Хулоса ва натижа
Ушбу фатводан ҳам кўриниб турибдики, агар ҳожи билмасдан ё эсдан чиқариб саъй амалини бажармай тақсир қилмаган бўлса, у ҳали ҳам эҳромдан чиқмаган ҳисобланади, агарчи эҳром либосини эгнидан чиқарган бўлса-да! Демак, зудлик билан эҳром боғлаб саъй амали ва тақсирни амалга ошириш учун Ҳарам томон йўл олади ва таматтуъ умрадан қолган бу икки амални бажаради. Шу билан, таматтуъ умранинг амаллари тўғри ва тўлиқ бўлади. Агарда ҳожи киши бу аснода эҳромдан чиққанман, деб ўйлаб ўз аёли билан жинсий алоқа қилиб қўйса, таматтуъ умрадан қолган мазкур икки амални бажариш билан бирга, бир сигирни каффорат сифатида бериш унга вожиб бўлади.
