Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
БИСМИЛЛАҲИР РОҲМАНИР РОҲИЙМ
Имом Маҳдий (а.ж) ғойибликдан чиқиб зуҳур қилишларига, яъни кўзларга кўринишларига фақат саккиз ой қолганида Суфёний чиқиш қилади. У пайт ул ҳазратнинг чиқишлари ўз-ўзидан маълум бўлади. «Имом Маҳдий (а.ж) келишлари учун вақт тайин қилувчилар ёлғон сўзлайдилар» деган кўрсатма у ерда қўлланмайди.
Имом Маҳдий (а.ж) келишларининг бешта қатъий белгилари бор бўлиб, ушбу бешта белгининг кетма-кет амалга ошишига эътибор қаратадиган бўлсак, биринчи белги – бу Суфёнийнинг чиқишидир. Унинг билан бир замонда рўй берадиган иккинчи белги Ямоний деган шахснинг чиқишидир.
Учинчи белги эса Имом Маҳдий (а.ж) чиқадиган кечада содир бўлади ва у самовий нидо ва чақириқдир. Тўртинчи белги «Байдо» деган жойда Суфёний қўшинини ер ютиши бўлиб, ушбу ҳодиса-воқеа тақрибан Имом Маҳдий (а.ж) чиқишларидан бир ой ўтгач содир бўлади.
Охирги белги-аломат эса Нафси Закийя, яъни пок бир инсоннинг Аллоҳ таоло Уйида (Каъбаи Муаззамада) ўлдирилиши бўлиб, бу ҳодиса зулҳижжа ойининг йигирма бешинчи куни, Имом Маҳдий (а.ж) чиқишларидан уч ой ва икки кун ўтгач содир бўлади.
Шунинг учун, агар биз буларни Имом Маҳдий (а.ж) чиқишларининг белги-нишоналари деб айтадиган бўлсак, у ҳолда ул ҳазратнинг зуҳур қилишлари деган сўзда бир оз тасарруф этган бўламиз. Зеро, охирги иккита белги аслида ул ҳазратнинг қиём қилишлари, яъни инқилобий ҳаракат қилишларининг белгисидир. Чунки, Имом Маҳдий (а.ж)нинг зуҳур қилишлари, яъни ғойиблик пардаси ортидан чиқишлари шак-шубҳасиз, Рамазон ойининг йигирма учинчи кечасида бўлади ва ул ҳазратнинг бутун дунёни ислоҳ қилиш учун амалга оширадиган инқилобий ҳаракатлари эса Муҳаррам ойининг ўнинчи куни, яъни Ошуро кунида бўлади.
Демак, Имом Маҳдий (а.ж)нинг зуҳур қилишлари билан қиём қилишлари орасида уч ой ва ўн етти кун вақт бор бўлиб, бу оралиқ вақт ичида ҳамма инсонлар ул ҳазрат билан танишадилар, у буюк зотнинг маданиятини, режа-дастурини, одоб-ахлоқини ҳамда йўл-йўриқ ва мантиғини эшитиб ўрганадилар. Сўнгра тушиниб етгач, ул ҳазратни чуқур тушунча ва ақл-идрок билан қабул қиладилар ёки Худо сақласин, ул зотга қарши чиқадилар.
Демак, шундай қилиб, бу бешта белги аниқ ва қатъий белгилардандир.
NAJOTKEMASI.NET – Халқаро Исломий Ахборот ва Тадқиқот Марказида тайёрланди.
