Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Бисмиллаҳир Роҳманир Роҳийм
Қўй, мол, туя, эчки, товуқ, ўрдак ва ғоздан иборат гўшти ҳалол ҳайвонларни сўйиш шартлари қуйидагилардан иборат:
1. Ҳайвонни Қибла томон ётқизиш, яъни ҳайвоннинг боши ва бутун бадани Қибла томон бўлиши шарт.
2. Ҳайвоннинг бўйнига пичоқ тортаётганда, Аллоҳ таолонинг номини тилга олиш, яъни «Бисмиллоҳ» дейиш вожибдир.
3. Бир пичоқ тортганда ҳайвоннинг авдожи арбаъа, яъни бўйнидаги тўртта асосий томирни кесиш шарт.
4. Ҳайвонни сўяётган шахс мусулмон бўлмоғи шарт.
5. Ҳайвонни темирдан бўлган пичоқ билан сўйиш керак.
Айрим мужтаҳидлар темир бўлмаса-да, балки ўткир шиша билан сўйилса ҳам жоиздир деб айтганлар. Лекин кўпчилик мужтаҳидлар темир пичоқ билан сўйишни вожиб деб биладилар.
Юқоридаги шартларга риоя қилган ҳолда гўшти ҳалол бўлган ҳайвон сўйилса, унинг гўшти ҳалол бўлади, акс ҳолда ўша ҳалол ҳайвоннинг гўшти ҳаром бўлиб, уни истеъмол қилиш жоиз бўлмайди.
Эслатиб ўтамиз, гўшти ҳалол ҳайвонни сўйганда юқоридаги шартларга риоя қилиш вожиб бўлиб, мазкур шартларга риоя қилиб сўйилган ҳайвонга шаръий сўйилган деб айтилади. Уларга риоя қилинмаган тақдирда, ўша гўшти ҳалол ҳайвоннинг гўштини еб бўлмайди. Чунки, шариат аҳкомларига риоя қилинмай сўйилган ҳайвон, агарчи ўзи ҳалол гўшт бўлса-да, аммо ношаръий сўйилгани учун, унинг гўшти ҳаром бўлади, уни ейиш жоиз ва мумкин бўлмайди.
Яна шуни эслатиб ўтиш лозимки, гўшти ҳалол ҳайвонни сўйишдан олдин унга сув бериш ҳамда жуда ўткир пичоқ билан сўйиш мустаҳабдир. Ва шунингдек, от, эшак ва хачирга ўхшаш ҳайвонларнинг гўшти ҳалол бўлгани учун, уларни ҳам юқоридаги шартларга риоя қилган ҳолда сўйилса, гўштини ейиш жоиз ва мумкиндир. Аммо ушбу ҳайвонларнинг гўштини шаръий сўйилган тақдирда ҳам истеъмол қилиш шариати исломияда макруҳ дейилган. Шунинг учун, бундай ҳайвонларнинг гўштини истеъмол қилишдан сақланиш яхшироқдир.
