Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
БИСМИЛЛАҲИР РОҲМАНИР РОҲИЙМ
Зулҳижжа ойининг 10-кунида қурбонлик қилиш Маккада Ҳаж амалини бажаришга мушарраф бўлган кишиларга вожиб бўлган амалдир, аммо бошқа мусулмонларга эса қурбонлик қилиш мустаҳаб амал саналади. Қурбонлик қилинадиган жонлиқ семиз бўлиши, агар қўй бўладиган бўлса шохли, қора ва кучли қўчқор бўлмоқлиги мустаҳабдир. Агар қурбонлик қилинадиган жонлиқ туя ёки сигир бўлса, у ҳолда урғочи бўлмоғи ва агар жонлиқ қўй ёки эчки бўлса, унда эркак ҳайвон орасидан танланиши яхшироқдир.
Қурбонлик қилинадиган ҳайвоннинг тухимдонлари тортилмаган (ахта қилинмаган), шохи синмаган, қулоқлари нуқсонли шаклда кесилмаган, озғин ва кўзлари кўр бўлмаган, оёғи оқсамайдиган бўлмоғи лозим. Бир сўз билан айтганда, қурбонлик қилинадиган жонлиқ нуқсонли бўлмаслиги керак. Бироқ белги-нишона қўйиш учун чўпонлар томонидан қўйнинг қулоғи жуда оз кесилган ёки тешилган бўлса, нуқсонли ҳайвон ҳисобланмай, қурбонлик қилишга яроқлидир.
Қурбонлик гўшти уч қисмга бўлиниши мустаҳаб бўлиб, шундан учдан бирини қурбонлик қилган кишининг ўзи ва оиласи тановул қилади, яна учдан бирини қўшниларига ва қариндошларига беради ва охирги учдан бирини эса муҳтож ва камбағалларга тарқатади.
Шариати исломияда қурбонлик гўштини имкон қадар Ҳайит намозидан олдин истеъмол қилиш тавсия этилган ва мустаҳиби муаккаддир, яъни таъкидланган мустаҳаб амалдир (1845-масала).
Қурбонлик қилаётган киши жонлиқни ўзи сўйиши мустаҳаб ҳисобланади ва ўзи сўя олмаган тақдирда қўлини сўювчининг қўли устига қўйиши мустаҳабдир. Қурбонликка аталган жонлиқни сўяётганда қуйидаги дуо ўқилади:
«وَجَّهْتُ وَجْهِيَ لِلَّذِي فَطَرَ السَّمٰواتِ وَالْأَرْضَ حَنِيفاً مُسْلِماً وَمَا أَنَا مِنَ الْمُشْرِكِينَ، إِنَّ صَلَاتِي وَنُسُكِي وَمَحْيايَ وَمَمَاتِي للّٰهِ رَبِّ الْعَالَمِينَ، لَاشَرِيكَ لَهُ وَبِذ ٰلِكَ أُمِرْتُ وَأَنَا مِنَ الْمُسْلِمِينَ، اَللَّهُمَّ مِنْكَ وَلَكَ، بِسْمِ اللّٰهِ وَاللّٰهُ أَكْبَرُ، اللَّهُمَّ تَقَبَّلْ مِنِّي».
Дуонинг Ўқилиши:
«Важжаҳту важҳия лиллазий фаторос-самааваати вал арзо ҳанийфан муслиман ва маа ана минал мушрикийн. Инна солаатий ва нусукий ва маҳйаайа ва мамаатий лиллааҳи Роббил ъааламийна лаа шарийка лаҳуу ва бизаалика умирту ва ана минал муслимийн. Аллоҳумма минка ва лака Бисмиллаҳи Валлоҳу Акбар, Аллоҳумма тақоббал минний».
Дуонинг Таржимаси:
«Юзимни Ҳаққа интилувчи ва таслим бўлган ҳолда осмонлар-у ерни яратган Зотга қаратдим ва мен мушриклардан эмасман. Шубҳасиз, менинг намозим, ибодатим, ҳаётим ва ўлимим оламларнинг Рабби бўлган Аллоҳ учундир, Унинг бирор шериги йўқдир ва мен шунга буюрилганман ва мен мусулмонларданман. Эй Аллоҳим, Сендан Сенинг амр-фармонинг билан ва Сен учун, Аллоҳнинг исми билан бошлайман ва Аллоҳ энг буюкдир. Эй Аллоҳим мендан қабул айла!»
Ва яна давомида айтилади:
«اللَّهُمَّ تَقَبَّلْ مِنِّي كَمَا تَقَبَّلْتَ مِنْ إِبْرَاهِيمَ خَلِيلِكَ وَمُوسىٰ كَلِيمِكَ وَمُحَمَّدٍ حَبِيبِكَ صَلَّى اللّٰهُ عَلَيْهِ وَآلِهِ وَعَلَيْهِمْ».
Дуонинг ўқилиши:
«Аллоҳумма тақоббал минний камаа тақоббалта мин Иброҳийма холийлика ва Мусаа калиймика ва Муҳаммадин ҳабийбика соллаллоҳу алайҳи ва алиҳий ва алайҳим».
Дуонинг Таржимаси:
«Эй Аллоҳим мендан қабул айла! Танлаган Дўстинг Иброҳимдан, Суҳбатдошинг Мусодан ва Ҳабибинг Муҳаммад (Аллоҳ унга ва унинг хонадони аҳлига саловоту дурудлар йўлласин)дан қабул қилганинг каби»
