Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Ассалому алайкум Нажот Кемаси жамоаси. Кеча куни бир аёл менга қўнғироқ қилиб бир саволни сўради. Аёл ўзи исломда эмас, лекин ўғли интернетдан ўқиб исломга кирган экан. Ўша аёлнинг айтишича, ўғлим хотинини фақат ётиб-туришда кечаси бўладими ёки кундузими, фарқи йўқ, мен билан ётасан деб хотинини азоб бераркан! Йўқ десанг, фаришталар сени лаънатлайди деб ҳар куни хотинини хоҳлаган пайт ётиб-туришга мажбурлар, хотини қаршилик қилса, болаларини урар экан. Хотин кундузи ишлаб чарчаб келаркан. Уйга келса, уй ишлари қозон-товоқ, юв-арт ва пишир-тушир билан банд, эри эса дангаса оғир меҳнат қилмайди, фақат енгил иш қидиради ва ҳар ой ишини алиштиради, на тўғри рўзғор қилади на болаларига қарайди.
Бечора аёл ҳам рўзғор, ҳам болаларига кейим-кечак қилади. Исломда аёл киши мажбурми, эри ётамиз дегандан ётиши? деб сураяпти.
Хай, бир ҳафтада бир марта ётсин! Бу нима аҳвол деб ўғлимни уришаман, дейди аёл.
Шуни сўрамоқчи эдим. Ўзи исломда жинсий муносабат масаласида чегара борми? Исломда шу тўғрисида биронта китобда ёзилганми?
БИСМИЛЛАҲИР РОҲМАНИР РОҲИЙМ
Ва Алайкум Ассалом ва Раҳматуллоҳ.
Ислом динида ҳар бир нарса чегара билан тайин қилинган ва ҳар бир нарсанинг белгиланган муайян чегараси бор. Умуман олганда, ислом дини тартиб-интизом, қоида-қонун асосида тузулган илоҳий диндир. Шариати исломияда эркак киши ўзини ҳалол умр йўлдошидан жинсий алоқа қилишни истадими, аёл бош тортмаслиги керак, дейилган ва бош тортса гуноҳ қилган бўлади! Натижада зино ва ахлоқий бузуқликлар жамиятда кенг тарқалади ва кўпайиб боради. Шунинг учун, жинсий алоқа қилишнинг вақти ҳам белгиланмаган, хоҳ кундузи бўлсин ёки кеч пайти. Демак, жинсий алоқани бир ҳафтада бир марта бўлсин, деб қайнона ёки бошқалар томонидан белгиланиши шариати исломияга зид бўлган иш саналади. Албатта, оила ва эру-хотин муносабатлари тўғрисида жуда ҳам кўп китоблар ёзилган.
Шуни ҳам айтиш керакки, динимизда аёл кишининг бўйнидаги вазифаси эрига қарашиш ва унинг эҳтиёжини қондириш бўлганидек, эркак киши ҳам ўртача ҳолда ўз аёлини едириб-ичириши ва кийинтириши вожиб ва фарз амал ҳисобланади. Шунингдек, рўзғорни таъминлаш ва болаларга кейим-кечак қилиш ҳам эркакнинг бўйнида бўлиб, бу иш эркак кишига шариатда вожиб қилинган.
Бу шариат бизга тайинлаб берган чегарадир! Аллоҳ таоло белгилаб берган чегарани бузмаслик керак. Акс ҳолда гуноҳкор ва золимлардан бўламиз!
Яна шуни эслатиб ўтишимиз керакки, Ислом динида шариат нуқтаи назаридан аёлга қозон-товоқ, юв-арт ва пишир-тушир каби уй ишларини бажариш вожиб қилинмаган. Аммо оила пойдевори мустаҳкам қолиши учун ахлоқий нуқтаи назардан аёл киши уй ишларини бажариши унинг томонидан бўлган фидокорлик ва ўта муносиб иш саналади ва ҳадиси шарифларда айтилганидек, бу ишнинг эвазига Аллоҳ таоло наздида Унинг йўлида жиҳод қилганлик ажр-мукофоти аёлга ато этилади.
Аллоҳ таоло ҳаммамизга Ўз динида собитқадам бўлишни ато этсин ва бизни Ўз йўлидан адаштирмасин!
