Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Ҳусайн ибн Илвон айтади:
Сафарда пулим тугаб қолган эди, шунда дўстлардан бири менга деди:
Бу ҳожатинг раво бўлиши учун кимга умид боғлагансан?
Дедим: Фалончи шахсга.
У деди: Демак, Аллоҳга онт бўлсинки, ҳожатинг раво бўлмас.
Дедим: Аллоҳ сени ўз раҳматига олсин. Сен буни қаердан билдинг? Шунда деди:
Имом Содиқ (а.с) марҳамат қилиб буюрадилар: Аллоҳ таоло шундай буюради:
Иззатим, юксаклигим ва аршимга қасамёд этиб айтаманки, Мендан бошқага умид боғлаган ҳар бир шахснинг орзусини ноумидлик билан узгайман, халойиқ наздида уни хору залил қилгайман, уни Ўз даргоҳимга яқинлашишдан қувгайман ва фазл-карамимдан уни йироқлаштиргайман. У оғир ҳолда қолганда Мендан бошқага умид боғлайдими? Ҳолбуки, мушкулларни осон этиш Менинг қўлимдадир.
Ва у Мендан бошқага умидвор бўладими? Ўз фикрида Мендан бошқанинг эшигини қоқадими? Ваҳолангки, барча ёпиқ эшикларнинг калити Менинг наздимдадир. Мендан мадад сўраганга Менинг даргоҳим эшиги очиқдир. Оғир кунларида Менга умид боғлаган қай бир шахснинг умидини узганман? Ким ўзининг буюк ишларида Менга умид қилган бўлсин-у ва Мен унинг умидини Ўзимдан узган бўлай?
Мен бандаларимнинг орзуларини ўз хузуримда сақлагайман ва улар эса Менинг сақлашимга рози бўлмайдилар. Ва осмонларимни Менга тасбиҳ айтишдан толиқмайдиган мавжудотларга тўлдирганман ва уларга: Мен билан бандаларим ўртасидаги эшикларни ёпманглар, деб буйруқ берганман.
Бироқ бандаларим Менинг сўзимга ишонмайдилар. Ўша банда билмайдими Мен томондан бирор бир ҳодиса унинг бошига тушганда Менинг изнимсиз ҳеч бир шахс ўша ҳодисани ундан бартараф эта олмайди?
Демак, нега Мендан юз ўгиради? Мен Ўзимнинг фазлу карамим билан Мендан истамаган нарсани унга бераман, сўнгра уни ундан оламан ва у ўша нарсани қайтариб беришни Мендан тиламай, ўзгадан истайдими?
У биладики, Мендан сўрашдан илгари унга ато этгайман, бироқ агар Мендан тиласа, Мен унга жавоб бермасманми?
Мен бахилманми бандам мени бахил деб билади?
Фазлу карам Мен томондан эмасми?
Авф ва раҳмат Менинг қўлимда эмасми?
Мен орзулар макони эмасманми? Демак, ким орзуларни Менга етиб келишидан олдин тўса олади?
Мендан бошқага умидвор бўлган кимсалар қўрқмайдиларми?
Агар бутун осмонлар ва ер аҳли Менга умид боғлашса ва Мен уларнинг ҳар бирига уларнинг барчаси умид қилган миқдорда ато этсам ҳам, чумолининг аъзосичалик Менинг мулкимдан озаймас.
Қандайига Мен бошқарадиган мулкдан озайиши мумкин? Демак, Менинг раҳматимдан ноумид бўлган шахсларнинг ҳолига вой бўлсин, Менга итоатсизлик қилиб, Мендан қўрқмайдиган кимсаларнинг ҳолига вой бўлсин. (Усули-Кофи, 3-жилд, 72-ҳадис, 107-бет)
