Najot Kemasi sayti Ушбу сайт Аҳли-Байт ғояси асосидаги соф ва ҳаётбахш Ислом дини ҳақида ишончли манбаларга таяниб теран маълумотларни ҳақиқат изловчиларига тақдим этиб боради.
Related Articles
Бисмиллоҳир Раҳмонир Раҳим
Келинг, Мардларча яшайлик, эй биродар!
Олдинги мақоламизда эркакларнинг оиладаги нуфузларининг тушиб кетганлиги сабаблари ҳақида айтиб ўтган эдик. Бу галги баҳсимизда эса юзага келган мушкулотни ҳал қилишнинг бир неча ечимларига ишора қилмоқчимиз. Марҳамат мутолаа қилинг, азиз эркаклар:
- Бемаза ҳазил-мутойиба қилишдан сақланингиз. Шу нарсани унутмангки, сизнинг бемаҳал ва бемаза ҳазилларингизга атрофингиздагилар фақат сизнинг ҳурматингиз учун табассум билан жавоб беришлари мумкин, аслида эса ҳеч ҳам кулгили эмасдур. Шунинг учун бечора аёлингиз хижолатга қолиб кетади. Бунинг устига бемаза хотираларингиз ёки айтган латифаларингиз сизнинг эркаклик виқорингизни анча рангсизлантириб қўяди. Кўп ҳазиллашиш инсонни енгил табиат қилиб кўрсатади, шунинг учун ҳам керагида оз-оздан ҳазилашиб туринг. Албатта, жиддий ва оғир бўлинг, деганимиз қовоғингиздан қор, тилингиздан заҳар томиб турсин, дегани эмасдир. Балки ҳар нарсанинг, жумладан ҳазил- мутойибанинг ҳам меъёрида бўлгани яхши, демоқчимиз, холос.
- Аёлингиз билан адаб юзасидан суҳбат қилинг. Баъзилар шундай хато фикрга борадиларки, гўё беадабларча гапириш самимиятни юзага келтирар эмиш. Лекин ёдингизда бўлсин, аёлингиз билан беадабларча гаплашишингиз унинг ҳам сизга нисбатан худди шундай муомалада бўлишига сабаб бўлади. Чунки, сиз ўз рафторингиз билан гўёки унга шундай рухсатни берган бўласиз. Шунинг учун айтишади-да: “Ҳар кимнинг ҳурмати унинг ўз қўлидадир” деб. Ҳазрат Али (алайҳис салом) айтадилар: «Сенинг қийматинг бошқаларга кўрсатган одобинг билан ўлчанади. Одобинг ошган сари қадру-қийматинг ҳам ошиб боради».
Айтганларимиз оилавий жанжал масаласига ҳам таалуқлидир. Агар сиз аёлингизга ундан содир бўлган камчилик ва айби учун бақирадиган бўлсангиз, у ҳам сизга бақириб жавоб қайтарадиган бўлади. Шунинг учун ҳам, агар аёлингиз бирор хатога йўл қўйган бўлса, унга бир оз қовоғингизни уйинг, тескари қаранг, у билан гаплашманг, лекин зинҳор ва зинҳор сўкманг, бақир-чақир қилманг. Қачонки, у ўзининг хатосини тушуниб ўша ишдан қўлини тортадиган бўлса, сиз қилган хатосини тезда унутиб аввалгидек самимий бўлинг. Алсо қилган хатосини юзига солманг. Бу ҳақда алсо суҳбатлашманг ҳам.
- Ҳатто агар ҳақлигингизни билсангиз ҳам аёлингиз билан кўп тортишманг. Унутмангки, аёл зоти баъзида эркакларнинг диққатини ўзига жалб этиш учун сизнинг устингиздан ўзингизга шикоят қилади ва ёки ўзининг “аянчли” аҳволидан арз қилади. Шунинг учун унинг гапларига диққат билан қулоқ осинг ва юзингизда унга эътибор бераётганлигингизни изҳор қилинг. Бунинг учун табассум қилишингиз ва ёки жиддий қиёфага киришингиз керак бўлади, рафиқангизнинг айтадиган мавзусига қараб. Чунки, кўпинча аёл киши бу гапларни айтиб сиздан жавобни кутмайди, балки фақат ичини бўшатиб олгиси келади, холос.
- Олдинги баҳсимизда ишора қилганимиздек, аёллар турмушга чиқишлари билан қийин шароитларда уларга суянчиқ бўладиган эркак бўлишини истайдилар. Бу эркак эса унинг эри бўлиши керак. Яқинларининг ўлими ёки оғир дардга мубтало бўлиши, хуллас қийин шароитга тушиб қолганида, сиз эркак оғир ва матонатли бўлишингиз керак. Сизнинг салобат билан қийинчиликларга қарашингиз рафиқангизга ҳам таъсир қилади ва у ҳам қийинчиликларни осонроқ енгиб ўтишига сабаб бўлади.
Ушбу мавзудаги баҳсимизга шу ерда якун ясар эканмиз, сиз азиз биродарлардан фикр ва мулоҳазаларингизни кутиб қоламиз.
NAJOTKEMASI.NET – Халқаро Исломий Ахборот ва Тадқиқот Марказида тайёрланди.
